الشوب والروب، عامية سودانية

Lyrikos ِArabice

Al Shoab wa Roab
By: SD
Drawing by Seif Laota

الشوب والروب

رسم سيف لعوتة

راقد علي صفحة شقاي،
ودمعي داشر وليك بعاين.
مُطنّش، كوني باتع فيني هجرك، 
وكونك أقرب لجراحي ومني نافر.
يوم تجيني ويوم ترسل لي محاذر 
ويوم تقول كلمة غرام.

لا لا ما تقول ها الكلام، ماك ليهو خابر.

ويوم، سُرُب، أسمع أحبك.

ألقى فجأة شفاهك أقرب، وتنشحط قدامنا

ساكوتة وغيوب،

فاقدات سمع، حالكات ضلام.

أبقى جمبي بدون قرار، بدون بيانات أو محاضر.

وبس كفاي.

بدون شفاه كايسات قبل، بدون شفون يزلق نداك.

لو وقعت علَي، براوة، جرحي بنبح لالتئام،

وين جرح يعدل جفاك؟

ولو مشيت مني، الاذية ونوح بكاي.

وبس كفاي!

أقول، أريتك حاسي بيا وما أظنك حاسي بيا.

أنا ال بحبك، أنا، وبراي. 

ليه مزعزعة فيك نوايا،

مرة زولي ومرة هاجر، ومرة سلطانك معاي،

يا بديع سحر الهيام.

الخشوع علمني صخبك

وفي القنوت بدعوك قيام.

في التمام، أنا في التمام،

وفي الغياب إنتَ، وغيابك حدّو تام.